कार्तिक मसान्तमा घटेको सुनको भाउ मंसीर संक्रान्तिमा बढ्यो, तोलाको कति पुग्यो ?

सोमबार, मंसिर १, २०८२

हिजो तोलामा ६ हजार नौसय रुपैयाँ घटेको सुनको मूल्य आज फेरि बढेको छ। सुनको मूल्यमा आज तोलामा पाँचसय रुपैयाँ बढेको नेपाल सुनचाँदी व्यवसायी महासंघले जनाएको छ। 

मूल्य बढेर आज सुन तोलाको दुई लाख ४३ हजार तीनसय रुपैयाँ पुगेको छ। हिजो तोलामा ६ हजार नौसय रुपैयाँ घटेर सुनको मूल्य दुई लाख ४२ हजार आठसय रुपैयाँमा झरेको थियो। 

यसअघि गएको बिहीबार सुन तोलामा पाँच हजार ६ सय रुपैयाँ बढेको थियो भने शुक्रबार तोलामा पाँचसय रुपैयाँ घटेर दुई लाख ४९ हजार सातसय रुपैयाँमा झरेको थियो। 

गएको असोज ३१ गते सुनको मूल्य तोलाको दुईलाख ५८ हजार आठसय रुपैयाँ पुगेको थियो। सुनको यो मूल्य हालसम्मकै सबैभन्दा उच्च हो।

आज चाँदीको मूल्य पनि बढेको छ। हिजो तीन हजार एकसय ३५ रुपैयाँमा किनबेच भएको चाँदीको मूल्य आज तीन हजार एकसय ५५ रुपैयाँ कायम भएको महासंघले जनाएको छ। 

प्रकाशित मिति: सोमबार, मंसिर १, २०८२  ११:४९
प्रतिक्रिया दिनुहोस्