काठमाडौँको नयाँ बानेश्वरमा प्रदर्शनकारी र प्रहरीबीच झडप भएको छ। झडपमा परेर नेपाल प्रहरीका डीएसपी गंगा पौडेल घाइते भएका छन्। 

स्वर्गद्वारी गुठीपीडित मोही किसान संघर्ष समितिले गरेको प्रदर्शन उग्र बनेपछि नियन्त्रण लिन लागेको प्रहरीमाथि आक्रमण भएको हो।    

सिंह दरबार प्रहरी वृत्तका डीएसपी पौडेललाई उपचारका लागि सिभिल अस्पताल नयाँ बानेश्वर लगिएको छ। उनको टाउकोमा गम्भीर चोट लागेको जिल्ला प्रहरी परिसर काठमाडौँका प्रमुख तथा एसएसपी विश्व अधिकारीले जानकारी दिए।  

'प्रदर्शनकारीले प्रहरीलाई झुक्याए। उनीहरू बिजुलीबजारबाट र्‍यालीसहित माइतीघर आउने भनेका थिए तर, प्रहरीलाई झुक्याएर बानेश्वरतिर गए,' उनले भने,' बानेश्वरमा निषेधित क्षेत्र तोडेपछि प्रहरीले रोक्न खोज्दा प्रदर्शनकारीले भाटाले हानेर प्रहरीलाई घाइते बनाए।'

अधिकारीका अनुसार १२ प्रदर्शनकारी पनि घाइते भएका छन्।