हनी ट्रयापको उद्योग चलाउने समूहसँग हिमचिम बढाएर सौदाबाजी गरेकी निलम्बित इन्सपेक्टर बिनुकुमारी शाहीलाई ललितपुर प्रहरीले हिरासतमा हुलेको छ। 

आइतबार अदालतमा उपस्थित भएकी उनको बयान र थुनछेक बहस नसकिएपछि अदालतले थुनामा राख्न ललितपुर परिसरमा पठाएको हो । उनलाई सोमबारसम्म थुनामा राख्न जिल्ला अदालतले पठाएको ललितपुर परिसरका एसएसपी शेखर खनालले बताए।

अदालत स्रोतका अनुसार बयान सम्पन्न भएपनि उनको थुनछेक बहसका लागि समय नपुगेपछि प्रहरीलाई जिम्मा लगाईएको हो । सोमबार उनको थुनछेक बहस हुनेछ। 

यसअघि फरार प्रतिवादी बनाएर उनलाई प्रहरीले संगठित अपराध र आपराधिक लाभ मुद्दा चलाएको थियो। भैंसेपाटी प्रभागको प्रमुख रहेको बेला हनि ट्रयापिङ गिरोहसँग मिलेर लाभ लिएको देखिएपछि उनीविरुद्ध मुद्दा चलेको थियो। 

जिल्ला प्रहरी परिसर, ललितपुरले यो घटनामा  ६ जनाविरुद्ध गत महिना नै मुद्दा दायर गरेको थियो। सुनसरीका ताज इस्लाम, सुष्मा विक र भीमादेवी थापा, प्रहरी जवान महेन्द्र हमाललाई पक्राउ गरेर मुद्दा दायर गरिएकोमा इस्लाम जेल गएका छन् भने अन्य तीन जना छुटेका छन्। 

प्रहरीले इन्सपेक्टर शाही र इटहरीका दर्शन पोखरेलविरुद्ध फरार प्रतिवादी बनाएर मुद्दा दायर गरेको थियो।