सोसल मिडिया
सम्पर्क
युनिकोड
नेपाली कांग्रेसका सभापति गगनकुमार थापाले पार्टीको आधिकारिकताका निम्ति भएको राजनीतिक तथा कानुनी लडाइँमा गलत तरिकाले कुनै रकम खर्च नगरिएको जिकिर गरेका छन् । बिहीबार (कात्तिक १९) भिडियो सन्देशमार्फत उनले आधिकारिकताको लडाइँमा कुनै आर्थिक लेनदेन वा अनुचित काम नभएको बताएका हुन् ।
उनले कांग्रेसको विशेष महाधिवेशनलाई विद्रोहको संज्ञा दिएका छन् । ०८२ भदौ २३ र २४ गतेको ‘जेनजी’ आन्दोलनको सम्मान गर्दै पार्टीभित्र पनि परिवर्तनको प्रयास गरिएको उनको भनाइ छ ।
कांग्रेसका तल्लो तहका कार्यकर्ताको ‘विद्रोह’मा आफूहरू सहभागी भएको उनले बताए । “विशेष महाधिवेशन भनेको विद्रोह हो । भदौ २३ र २४ गतेको जेनजीले विद्रोह गरे । त्यही विद्रोहको सम्मान गर्दै पार्टीभित्र चेन्ज चाहिन्छ भनेर हामीले कोसिस गर्यौँ, स्थापित भयो,” उनले भने, “कांग्रेसका भुइँ तहका कार्यकर्ताको विद्रोह हो । त्यो विद्रोहमा हामी मिसिएको हो ।”
विद्रोह गर्नेहरूले परिणामको चिन्ता नगर्ने पनि उनले बताए । “विद्रोह गर्नेले परिणामको चिन्ता गर्छ ? के होला भनेर सोच्छ ? सोच्दैन नि,” उनले भने ।
निर्वाचन आयोग र अदालतबाट पार्टीको आधिकारिकता पाउने प्रक्रियामा करोडौँ रुपैयाँ खर्च गरिएको भन्ने चर्चाको उनले खण्डन गरे । “करोडको कुरा गर्छन् । नेपाली कांग्रेसको आधिकारिकताको लडाइँमा, राजनीतिक र कानुनी लडाइँमा रुपैयाँ होइन, एक सुकोको पनि कुनै आर्थिक लेनदेन, कुनै अनुचित काम गरेको छैन, भएको छैन,” उनले भने ।
बिचौलिया भनिएका इनम सापकोटासँग जोडिएको अडियो प्रकरणबारे पनि कांग्रेसले सार्वजनिक रूपमा जवाफ दिँदै हिँड्न आवश्यक नरहेको थापाको तर्क छ ।
उनले भने, “बिचौलिया इनम सापकोटाको अडियो भनेर बजारमा आएको कुरामा, हाम्रो बारेमा यस्तो सुनियो भनेको बारेमा हामीले सार्वजनिक रूपमा उत्तर दिएर हिँड्नुपर्ने ?
कांग्रेसको आधिकारिकता थापा समूहले १८ करोड खर्चेर पाएको सापकोटाले आरोप लगाएको भनिएको अडियो यसअघि सार्वजनिक भएको थियो ।
