सोसल मिडिया
युनिकोड
नेपाली कांग्रेसका सभापति शेरबहादुर देउवाले पार्टीका पदाधिकारी तथा पूर्वपदाधिकारीको बैठक बोलाएका छन् ।
पार्टीभित्र देखिएको महाधिवेशन विवाद मिलाउन उनले दिउँसो १ बजे आफ्नै निवास महाराजगन्जमा बैठक बोलाएका हुन् ।शनिबारको छलफल निष्कर्षविहीन भएपछि देउवाले यसलाई आज पनि निरन्तरता दिएका हुन् ।
बैठकमा इतर समूहका नेता डा. शेखर कोइराला, निवर्तमान गृहमन्त्री रमेश लेखकसहितका पदाधिकारी र पूर्वपदाधिकारी तथा वरिष्ठ नेताहरूलाई बोलाइएको छ ।
गत असोज २८ गते उपसभापति पूर्णबहादुर खड्कालाई कार्यवाहक सभापतिको जिम्मेवारी दिएपछि देउवा एक महिनासम्म पार्टीका गतिविधिमा देखिएका थिएनन् । तर, पार्टीभित्र महाधिवेशनबारेको विवाद समाधान गर्न उपसभापति खड्काले गरेको प्रयास सार्थक नभएपछि देउवाले पुनः सक्रियता देखाएका हुन् ।
बिहीबारदेखि नेताहरूसँग छुट्टाछुट्टै छलफल गरिरहेका देउवाले आज संस्थापन र इतर दुबैतर्फका नेताहरूलाई छलफलमा बोलाएका हुन् ।
कांग्रेसमा संस्थापन पक्षका केही नेताले पार्टीको १५औँ महाधिवेशन फागुन २१ मा तोकिएको प्रतिनिधिसभा निर्वाचनपछि मात्रै गर्नेमा अड्डी कसेका छन् । त्यस्तै इतर पक्षले पुसभित्रै महाधिवेशन सकेर आगामी २१ फागुनका लागि तोकिएको प्रतिनिधि सभा निर्वाचनमा सहभागी हुनुपर्ने भनिरहेका छन् ।
यसै विषयको विवाद टुंग्याउन देउवाले छलफल राखेका हुन् । यो छलफलले नियमित वा विशेष महाधिवेशन गर्ने भन्ने विषय आज टुङ्ग्याउने छ ।
