सोसल मिडिया
युनिकोड
प्रधानमन्त्री सुशीला कार्कीले एमालेलाई संस्थागत रूपमै चुनावका काममा सहयोग गर्न अनुरोध गरेकी छन् । प्रधानमन्त्री कार्कीले एमाले नेताहरूलाई बोलाएर बिहीबार बालुवाटारमा छलफल गरेकी थिइन् । त्यसक्रममा एमालेले संस्थागत रूपमै अब निर्वाचनमा जाने कुरामा अग्रसरता देखाउन अनुरोध गरिन् ।
उनले एमालेले देखाएका सुरक्षा लगायतका चासोहरुलाई सम्बोधन गर्न सरकार लागिरहेको उल्लेख गरिन् । बैठकमा सहभागी एमाले नेता महेश बर्तौलाका अनुसार सरकारको गठनको विषय नै संवैधानिक परीक्षणको क्रममा रहेकाले यसको छिनोफानो भएपछि मात्र अन्य कुरा अघि बढ्न सक्ने धारणा एमाले नेताहरूले राखेका थिए ।
‘हामी सहित सर्वोच्च अदालतमा गएका छौँ । सरकार निर्माणको विषय नै संवैधानिक परीक्षणमा छ’ बर्तौलाले भने,’ फागुन २१ गते निर्वाचन गराउने विषयमा हामी विश्वस्त छैनौँ ।’
निष्पक्षता र निर्भयतासाथ चुनाव हुने विश्वस्त वातावरण नभएको एमाले नेताहरूले बताएका थिए । ‘शान्ति सुरक्षा र भयरहित वातावरण हुनुपर्छ । मतदताले पनि विवेकको मत मतदानकेन्द्रमा आएर व्यक्त गर्ने सहज परिस्थिति छैन’ उनले भने ।
एमाले नेताहरूले निवर्तमान आइजीपी चन्द्रकुबेर खापुङ पदकबाट हट्ने बित्तिकै उनलाई स्थानहद गरिएको घटनाले प्रहरीको मनोबल झन् खस्किएको भन्दै प्रधानमन्त्रीको ध्यानाकर्षण गराएका थिए । भागेका कैदीबन्दी, लुटिएका हतियार फेला नपरेको लगायतका विषयहरू पनि उनीहरूले उठाएका थिए ।
एमाले नेताहरूले पार्टी लोकतन्त्रमा विश्वास गर्ने दल भएकाले जनतामा जाने कुरालाई जहिले पनि तयार रहेको बताए । ‘लोकतन्त्रका लागि लागेको पार्टी एमाले सबैभन्दा बढी जनतामा जान रुचाउने पार्टी हो । त्यसका लागि वातावरण खोजिरहेको छ’ बर्तौलाले भने । एमाले नेताहरूले संवैधानिक परीक्षणको पाटोबाट छिटो टुङ्गिए अन्य विषय सहज रूपमा जान सक्ने धारणा राखेका थिए ।
