नेकपा (एमाले) मा फर्किने तयारी गरिरहेकी नेकपा एकीकृत समाजवादीका स्थायी कमिटी सदस्य रामकुमारी झाँक्रीको समूहले आज पत्रकार सम्मेलन गरेर आफ्नो धारणा सार्वजनिक गर्दै छ। झाँक्री समूहले अहिले बिहान १०:४५ बजे होटल बसेरा बबरमहलमा पत्रकार सम्मेलनको आयोजना गर्न लागेको हो । 

‘विकास र समृद्धिको मार्गमा अगाडि बढ्न हामी लिने बाटो कस्तो हुन्छ भन्ने सन्दर्भमा विचार, विमर्श गर्न, नेकपा एकीकृत समाजवादीमा आबद्ध क्रान्तिकारी साथीहरूले पत्रकार सम्मेलनको आयोजना गरेका छौँ’, उनले जानकारी गराएकी छन् ।

नेपालको कम्युनिस्ट आन्दोलनलाई एकताबद्ध गर्दै राष्ट्रियता, प्रजातन्त्र, सामाजिक न्याय, विकास र समृद्धिको दिशामा अघि बढ्न, सैद्धान्तिक र वैचारिक दृष्टिकोण मिल्ने राजनीतिक शक्तिहरू एक ठाउँमा आउन आवश्यक छ भन्ने कुरा बोध गरी विचार, विमर्श गर्न लागिएको उनको भनाइ छ।

एकीकृत समाजवादी माओवादी केन्द्रसहित ९ कम्युनिस्ट घटकसँग एकतामा जाने भएपछि उनीहरू आफ्नो पुरानै पार्टी एमालेमा फर्किन लागेका हुन्। माओवादी केन्द्र, एकीकृत समाजवादीसहितका नौ वाम घटकबीच आज दिउँसो १ बजे पार्टी एकता घोषणा हुँदै छ।