धर्म, संस्कृति तथा नागरिक बचाउ अभियानका संयोजक दुर्गा प्रसाईंले पछिल्लो सरकार विदेशीको षड्यन्त्रमा बनेको दाबी गरेका छन् । फेसबुकमा एक भिडियो पोस्ट गर्दै प्रसाईंले काठमाडौं महानगरपालिकाका प्रमुख बालेन्द्र शाह (बालेन) को भूमिका र सक्रियताप्रति पनि शंका व्यक्त गरेका छन् । उनले भनेका छन्, ‘पश्चिमाहरूको प्रभावले देशलाई कुन स्थितिमा पुर्‍याउँदै छ, अब हुने त्यही हो ।’ 

बालेनले नै आफूहरूलाई आन्दोलनमा सहभागी नहुन भनेको उनले स्मरण गरे । जेनजी आन्दोलनमा आफू र आफ्ना कार्यकर्ता नभएको उनले दाबी गरे ।  

‘मान्छेका घर जलाउनु, सम्पत्ति तोडफोड गर्नु, सिंहदरबार, सर्वोच्चमा आगो लगाउनु दुखदायी हो, यो घटनामा हाम्रो अभियानको पनि नाम आयो, हामी राजावादी होइनौँ’, प्रसाईंले भने, ‘हामी यो कार्यक्रममा संलग्न छैनौँ ।’