संघीय मामिला तथा सामान्य प्रशासनमन्त्री भगवती न्यौपानेले मन्त्रालयमा बेथिति रहेको बताएकी छिन् ।

बुधबार प्रेस चौतारी नेपालले मन्त्रालयमा गरेको पत्रकार सम्मेलनमा मन्त्री न्यौपानेले छोटो समयमै नेपालको सरुवा प्रणालीमा बेथिति रहेको बुझेको बताइन् । 'यहाँ धेरै चुनौती छ भन्ने बुझेँ । एक/एक महिनामा सरुवा हुने र गरिदिनू भन्ने भेटघाटले असाध्यै व्यस्त बनायो,' उनले भनिन्, 'सरुवा गर्न लगाउन नेताकोमा धाउने, सिनियर कर्मचारीकोमा धाउने प्रचलन रहेछ । यस्तो बेथिति हटाउन एउटा कानुनअनुसारको विधि, प्रक्रियामा रहनुपर्छ भन्ने लागेको छ ।'

मन्त्री न्यौपानेले सेवाग्राहीमा रहेको पैसाबिना आफ्नो काम हुँदैन भन्ने सोच र कर्मचारीमा पैसा नभई सरुवा हुँदैन भन्ने सोचको अन्त्य गरिछाड्ने बताइन् । साथै, उनले आफ्नो नाम लिएर कसैले पैसा लिएको थाहा पाए सूचना उपलब्ध गराइदिन आग्रहसमेत गरेकी छन् ।

'म त लोभी छु, कुनै कामको बहानामा कसैले आर्थिक प्रलोभनमा पारे मलाई तुरुन्तै जानकारी दिनुहोला,' उनले भनिन् ।