संघीय निजामती सेवा विधेयकको प्रतिवेदनमा थपिएको ‘कुलिङ पिरियड’को लफडा केलाउन गठित अध्ययन तथा छानबिन विशेष समितिको बैठकले समितिको कार्यविधिलाई अन्तिम रुप दिएको छ ।

असार २५ गते सिंहदरबारमा बसेको बैठकले समितिको कार्यविधिलाई अन्तिम रुप दिएको हो । बैठकपछि सञ्चारकर्मीहरूसँग कुरा गर्दै समितिका संयोजक जीवन परियारले कार्यविधिका बारेमा मंगलबारबाट काम सुरु गरेको र आजको बैठकले अन्तिम रूप दिएको जानकारी दिए । 

अब पारित गर्न मात्रै बाँकी रहेको उनको भनाइ छ । संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकको कुलिङ पिरियडसम्बन्धी व्यवस्थामा गडबडी भएको थियो । गडबडीबारे छानबिन गर्न प्रतिनिधिसभाबाट सोमबार सात सदस्यीय संसदीय विशेष छानबिन समिति घोषणा भएको थियो । 

समितिको संयोजकमा कांग्रेसका सहमहामन्त्री समेत रहेका सांसद जीवन परियार छन् । संसद्को नियमावली, २०७५ को नियम १८ बमोजिम गठन गरिएको समितिमा नेपाली कांग्रेस र नेकपा एमालेबाट दुई–दुईजना, नेकपा माओवादी केन्द्र, राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)बाट एक–एकजना सदस्य छन् । परियार नेपाल सरकारको उपसचिव सीता परियारका श्रीमान् हुन्। उनी दलित समुदायबाट प्रमुख जिल्ला अधिकारी (प्रजिअ) हुने नेपालकै पहिलो महिला हुन्।

नेपाली कांग्रेसबाट संयोजक परियारसहित र सुशीला थिङ तथा एमालेबाट ईश्वरी घर्ती र नारायण आचार्य समितिमा छन् । त्यस्तै, नेकपा (माओवादी केन्द्र)बाट माधव सापकोटा, राष्ट्रिय स्वतन्त्र पार्टीबाट गणेश पराजुली तथा राष्ट्रिय प्रजातन्त्र पार्टीबाट रोशन कार्की छन् । समितिलाई छानबिन तथा अध्ययनका लागि २१ दिनको समय दिइएको छ ।