राष्ट्रिय प्रजातन्त्र पार्टी (राप्रपा) का वरिष्ठ नेता एवं प्रतिनिधिसभा सदस्य पशुपति शमशेर जबरा नागरिक अभिनन्दन तथा जनसम्मानबाट सम्मानित हुने भएका छन् । उनलाई नाती जर्नेल भनेर पनि चिनिन्छ ।

आज (बुधबार) रिपोर्टर्स क्लब नेपालमा पत्रकार सम्मेलन गरी जबराको ८४औं जन्मोत्सवको अवसरमा उनलाई सम्मान गर्न लागिएको जानकारी गराइएको हो ।

जबराले नेपालको सामाजिक, आर्थिक र शैक्षिक क्षेत्रमा पुयाएको योगदानको कदर गर्दै जनसम्मान गर्न लागिएको वरिष्ठ राजनीतिज्ञ मदनदास श्रेष्ठले बताए । जनसम्मान कार्यक्रम विभिन्न ५० ओटा संस्थाहरुले संयुक्त रुपमा आयोजना गरेको पनि उनले बताए ।

‘आउँदो शुक्रबार (२७ गते) प्रज्ञा भवनमा जनसमुदायबाट अभिनन्दन गर्ने कार्यक्रम रहेको छ । पशुपति शमशेर जबरा एउटा ज्यूदो इतिहास हुनुहुन्छ । 

उहाँ विभिन्न कालखण्डको ज्यूँदो इतिहास हुनुहुन्छ । सामाजिक, आर्थिक, शैक्षिक र हरेक क्षेत्रमा उहाँको ठूलो योगदान छ । त्यसैले काठमाडौं उपत्यकाका नेवार जनसमुदाय साथै विभिन्न ५० वटा सामाजिक संघ संस्थाहरुले अभिनन्दन कार्यक्रम आयोजना गर्दैछ,’– उनले भने ।

जनसम्मान मूल समारोह समितिका संयोजक नवीन शाहीले पशुपति शमशेरले नेपाली राजनीति, संस्कृति र राष्ट्रसेवामा दीर्घकालीन योगदान पुर्याएकाले जनसम्मान प्रदान गर्न लागिएको बताए । ‘पशुपति शमशेर जबराज्यूको ८४औं जन्मदिनको उपलक्ष्यमा हामीले समाजमा क्रियाशील विभिन्न संघ संस्थाहरुलाई एकीकृत गरेर उहाँलाई जनसम्मान आयोजना गरेर मनाउन लागिएको हो,’– उनले भने ।

जबराले लामो राजनीतिक जीवनमा नेपालको लोकतान्त्रिक विकास, राष्ट्रिय एकता, संविधानवाद, र समावेशी समाज निर्माणका लागि पुरÞ्याएको योगदान अत्यन्त मूल्यवान् रहेको उनले बताए ।