पशुपतिको गर्भगृहको जलहरी प्रकरणका तीनभाईलाई विशेष अदालतले सुनपानी छर्किएको छ। 

प्रतिवादीहरु डा प्रदिप ढकाल, डा मिलनकुमार थापा र अरुणकुमार श्रेष्ठलाई अदालतले सफाइ दिएको हो।

विशेष अदालतका अध्यक्ष टेकनारायण कुँवर र सदस्य मुरारीबाबु श्रेष्ठको इजलासले उनीहरू निर्दोष भएको ठहर गरेको हो।

अख्तियार दुरुपयोग अनुसन्धान आयोगले गत वर्ष १४ असोजमा विशेषमा भ्रष्टाचार मुद्दा दायर गरेको थियो। 

पशुपतिको जलहरी निर्माण र प्रतिस्थापनमा अनियमितता भएको दाबीसहित तीनैजनालाई प्रतिवादी बनाई मुद्दा चलाइएको थियो। जलहरीमा एक हजार ४ सय ९१ ग्राम ७१८ मिलिग्राम सुन भ्रष्टाचार भएको दाबी अख्तियारले गरेको थियो।

ढकाल सदस्य सचिव र थापा कोषाध्यक्ष थिए। कोषाध्यक्षको पदावधि सकिएपछि थापालाई सरकारले सदस्य सचिव बनाएको थियो। उनीमाथि मुद्दा दायर भएपछि राजु केसीले सदस्य सचिवको जिम्मेवारी पाएका छन् ।