नेपाली कांग्रेसको संस्थापनपक्षले पार्टीको १५औँ महाधिवेशनअन्तर्गतका अधिवेशन अघि बढाउन असहयोग गरेको भन्दै इतर समूहमा रहेका चार जिल्ला सभापतिको जिम्मेवारी खोसेर कार्यवाहक सभापति तोकेको छ ।

पार्टी केन्द्रीय कार्यालयका कार्यवाहक मुख्यसचिव कृष्णप्रसाद दुलालका अनुसार कञ्चनपुर, मुगु, डोटी र बागलुङका जिल्ला सभापतिको जिम्मेवारी खोसिएको हो ।

जिम्मेवारी खोसिनेमा कञ्चनपुरका पदम बोगटी, मुगुका ऐनबहादुर शाही, डोटीका नरेन्द्रबहादुर सिंह र बागलुङका जित शेरचन छन् । उनीहरूलाई पार्टीको संस्थापनइतर समूह तथा पूर्वसभापति शेरबहादुर देउवापक्षसँग निकट मानिन्छ ।

निर्णयअनुसार कञ्चनपुरमा बोगटीको स्थानमा हरिचन्द्र राना, मुगुमा ऐनबहादुर शाहीको स्थानमा हरिजङ्ग शाही, डोटीमा सिंहको स्थानमा नारायणबहादुर बलायर र बागलुङमा शेरचनको स्थानमा तारानाथ पौडेललाई कार्यवाहक जिल्ला सभापतिको जिम्मेवारी दिइएको छ ।

जिम्मेवारी खोसिए पनि सम्बन्धित जिल्ला सभापतिहरूको निर्वाचित पद भने कायमै रहने कांग्रेसले जनाएको छ । 

यसैबीच, जिम्मेवारी खोसिएका कञ्चनपुरका सभापति पदम बोगटीले कांग्रेसको महाधिवेशन प्रक्रिया तत्कालका लागि स्थगित गर्न माग गरेका छन् । विज्ञप्ति जारी गर्दै उनले पार्टीको वैधानिकता, नेतृत्व तथा विशेष महाधिवेशनसँग सम्बन्धित विषय सर्वोच्च अदालतमा विचाराधीन रहेकाले अदालतको फैसला नआएसम्म महाधिवेशनका कार्यक्रम अघि नबढाउन आग्रह गरेका छन् ।

उनले अदालतमा विचाराधीन विषय टुंगो नलाग्दै एकपक्षीय रूपमा संगठनात्मक गतिविधि अघि बढाउनु उचित नहुने जिकिर गरेका छन् ।

कांग्रेसको १५औँ महाधिवेशनअन्तर्गत यही असोज ३ र ४ गते वडा अधिवेशन  हुँदै छ । वडा अधिवेशनसँगै कांग्रेसले महाधिवेशनको औपचारिक प्रक्रिया अघि बढाउने तयारी गरेको छ ।

महाधिवेशनको पहिलो चरणका रूपमा हुने वडा अधिवेशनपछि क्रमशः पालिका, प्रदेशसभा निर्वाचन क्षेत्र, प्रतिनिधिसभा निर्वाचन क्षेत्र, महाधिवेशन हुनेछ । महाधिवेशन यही असोज १६ गते काठमाडौंमा सुरु हुनेछ । त्यसका लागि तयारी पनि सुरु भइसकेको छ । सभापति गगन थापाले महाधिवेशनका लागि विभिन्न समिति बनाउने बताएका छन् । 

महाधिवेशनको कार्यतालिका र प्रक्रियालाई लिएर कांग्रेसभित्र संस्थापन पक्ष र इतर समूहबीच विवाद कायमै रहेका बेला चार जिल्ला सभापतिको जिम्मेवारी खोसिनुलाई पार्टीभित्रको आन्तरिक संघर्षकै अर्को घटनाका रूपमा हेरिएको छ ।