सोसल मिडिया
युनिकोड
नेकपा एमालेका प्रमुख सचेतक ऐन महरले राहदानी विभाग अगाडि आत्मदाह गर्ने मुगुका २५ वर्षीय गणेश नेपालीको मृत्युलाई राज्यले गरेको हत्याको संज्ञा दिएका छन् । प्रतिनिधिसभाको बैठकमा शुक्रबार महरले संसदमै सरकारविरुद्ध नाराबाजीसमेत गरेका छन् ।
गृहमन्त्री र सरकारको कार्यशैलीप्रति टिप्पणी गर्दै महरले सरकार स्टन्टमा मात्र केन्द्रित भएको बताए । ‘स्टन्ट गर्ने बानी सरकारले छोड्नुपर्छ । राज्यले नागरिकलाई आत्मदाह गर्ने ठाउँमा पुर्याएको छ । सुकुम्बासी हुन् वा गणेश नेपाली, नागरिकलाई जबर्जस्ती मृत्युको मुखमा धकेल्ने काम राज्यले गरिरहेको छ । यसको जिम्मेवारी वर्तमान नेतृत्वले लिनुपर्छ,’ महरले भने ।
सांसद महरले निरंकुश राणा शासनको अन्त्यका लागि योगमाया न्यौपानेले जलसमाधि लिएको स्मरण गराए । उनले गणेश नेपालीको हत्या सरकारले गरेको बताए ।
‘योगमाया न्यौपानेको जलसमाधिले राणा शासन ढल्यो भने गणेश नेपालीको आत्मदाहका कारण यो सरकारले पनि ठूलो मूल्य चुकाउनुपर्नेछ । यो हत्याको जिम्मेवार यो सरकार नै हो,’ महरले भने ।
आफ्नो भनाइ टुंग्याउने क्रममा उनले ‘यो सरकार मुर्दावाद’ भने ।
