विशेष अदालतले भिजिट भिसा प्रकरणमा लाखौँ रुपैयाँ असुली काण्डमा बिचौलिया बालकृष्ण खड्कालाई ५ लाख धरौटीमा छाड्न आदेश दिएको छ । 

मंगलबार विशेष अदालतका न्यायाधीशत्रय नारायणप्रसाद पौडेल, डिल्लीरत्न श्रेष्ठ/विदुर कोइरालाको इजलासले ग्रिनलाइन होलिडेज प्रालिका सञ्चालक खड्कालाई धरौटीमा छाड्ने आदेश दिएको हो । 

अख्तियार दुरुपयोग अनुसन्धान आयोगले गत २५ मंसिरमा सहसचिव तिर्थराज भट्टराईसहित ६ जनाविरुद्ध मुद्दा दायर गरेको थियो । जसमा प्रतिवादी रहेका भट्टराई यसअघि नै पाँच लाख रुपैयाँ धरौटीमा छुटिसकेका छन् ।

अख्तियारको अनुसन्धानमा खड्काले भिजिट भिसामा जाने मान्छे खोज्ने र भट्टराईले सोहीअनुसार प्रस्थान अनुमति दिने गरेको खुलेको छ । यसरी दिनमै अध्यागमनमा ५० लाख रुपैयाँ भन्दा धेरै पैसा असुली हुने गरेको छानबिनमा खुलेको थियो । सहसचिव भट्टराई र बिचौलिया खड्काबिच नियमित रूपमा ह्वाट्सएपमा कुरा हुनुका साथै आर्थिक लेनदेन देखिएको थियो ।

यस प्रकरणमा अख्तियारले तत्कालीन गृहमन्त्री रमेश लेखक, सचिव गोकर्णमणि दुवाडी, लेखकका पिएहरु बद्री तिवारी र जनक भट्ट, अध्यागमन विभागका तत्कालीन महानिर्देशक गोविन्द रिजाल तथा गृह मन्त्रालयका अन्य अधिकारीमाथि दोस्रो चरणमा छानबिन गरिरहेको छ ।