एमालेको नेतृत्वका लागि भइरहेको प्रतिस्पर्धामा संस्थापन पक्षले प्रभूत्व बनाइरहँदा अध्यक्ष केपी शर्मा ओलीका निकटस्थ मानिने नेता विष्णु रिमाल भने ‘असुरक्षित’देखिएका छन् । ओलीको बिहे गराउने व्यवस्थाको चाँजोपाँजो मिलाएका दिनदेखिका दाहिना रिमाललाई महाधिवेशन प्रतिनिधि देब्रे भएका हुन्। 

सातजनाले उपमहासचिवका लागि उम्मेदवारी दिएकोमा ४ जनाबीच कडा टक्कर देखिएको छ । विष्णु रिमाल अहिलेसम्म चौथो स्थानमा छन् । उनी उक्लिने संकेत समेत छैन। 

पछिल्लो अपडेटअनुसार उपमहासचिवमा लेखराज भट्टराई सर्वाधिक मत आएको छ । माओवादी पृष्ठभूमिबाट आएका उनी यसअघि सचिव थिए । संस्थापन पक्षले फेरि पनि सचिवमा नै उठाउन चाहेपछि उनले विद्रोह गर्दै उपमहासचिवमा उम्मेदवारी दिए । अन्ततः संस्थापनले उनलाई आफ्नो प्यानलमा उपमहासचिवमै राखेको छ । यसअघि उपमहासचिवमा राखिएका भानुभक्त ढकाललाई सचिवमा झारिएको थियो ।

लेखराजपछि रघुवीर महासेठ दोस्रो स्थानमा छन् भने ईश्वर पोखरेल प्यानलका योगेश भट्टराई तेस्रोमा छन् । रघुवीर र योगेशबीच ३ भोटको मात्र अन्तर छ । पछिल्लो अपडेट अनुसार रघुवीरले २६७ मत ल्याउँदा योगेशले २६४ मत ल्याएका छन् ।

संस्थापन पक्षका उम्मेदवार विष्णु रिमाल २३० मतका साथ चौंथो स्थानमा रहेका छन् । अहिल्यै उनी प्रतिस्पर्धाबाट बाहिर भने भइसकेका होइनन् । भोटको रफ्तार बढाए भने टप थ्रीमा अटाउन पनि सक्छन् । उनी रिस्कमा भने अवश्य छन् । उनी पराजित भएको खण्डमा अध्यक्ष ओलीलाई धक्का लाग्नेछ । उनी हार्नु भनेको ओली स्तब्ध हुनु सरह हुने एक नेताले बताए।