ऊर्जा, जलस्रोत तथा सिँचाइ मन्त्री कुलमान घिसिङले विद्युत् विकास विभागको महानिर्देशक जीवछ मण्डललाई हटाएर मनदेवी श्रेष्ठलाई नियुक्त गरेका छन् । श्रेष्ठ विभागको पहिलो महिला महानिर्देशक बनेकी छन् ।

मण्डललाई मन्त्रालयमा सरुवा गरिएको छ । करिब डेढ महिनाअघि तत्कालीन मन्त्री दिपक खड्काले मण्डललाई महानिर्देशक बनाएका थिए । मण्डलले सहसचिव हुँदा घिसिङलाई नेपाल विद्युत् प्राधिकरणको कार्यकारी निर्देशक पदमा रहँदा कार्यसम्पादन मूल्यांकनमा शून्य अङ्क दिएका थिए, जसको उद्देश्य उनलाई हटाउनु थियो । 

गत चैत ११ को मन्त्रिपरिषद् बैठकले घिसिङलाई हटाएर हितेन्द्रदेव शाक्यलाई नियुक्त गरेको थियो । मन्त्री बनेपछि घिसिङले माथिल्लो तहका कर्मचारी सरुवा र खटनपटन सुरु गरेका छन् । हितेन्द्रलाई हटाएर मनोज सिलवाललाई प्राधिकरणको कार्यकारी निर्देशक बनाइएको छ ।

असोज ५ को मन्त्रिपरिषद् बैठकले शाक्यलाई जल तथा ऊर्जा आयोगमा सरुवा गरेको थियो । घिसिङले भौतिक पूर्वाधार र सहरी विकास मन्त्रालय पनि सम्हालेका छन्, तर ती मन्त्रालयमा कर्मचारी सरुवा गरेका छैनन् । ऊर्जा मन्त्रालयले भदौ १८ र २० मा गरेको सरुवा निर्णय पनि रद्द गरिएको छ । मण्डलको हटाउने निर्णय शुक्रबार मन्त्रिस्तरीय निर्णयबाट भएको हो ।