अन्तरिम सरकारकी प्रधानमन्त्री सुशीला कार्कीले आज सिङ्गदरबार पुगेर पदभार ग्रहण गरेपछि मन्त्रिपरिषद् विस्तार गर्ने तयारी गरेकी छन्।

मन्त्रिपरिषद् विस्तारको तयारीका लागि प्रधानमन्त्री कार्की आफ्ना सहयोगीहरूसँग छलफलमा रहेकी छन्। उनको र काठमान्डू महानगरका मेयर बालेन साहको हिजो राति दुई घण्टा मन्त्रीका विषयमा छलफल भएको बुझिएको छ। भोटिंग मार्फत मन्त्री छान्ने भनिए पनि बालेन र कार्कीको आपसी सल्लहमा मन्त्री छनोट गरिने भएको हो। 

केहीले भने कार्की सरकारमा मन्त्री बन्न अस्वीकार गरेका छन्। रास्वपाकी निवर्तमान सांसद सुमना श्रेष्ठले मन्त्री पद अस्वीकार गरेकी हुन्। 

अहिले सबै मन्त्रालयको जिम्मेवारी प्रधानमन्त्री कार्कीले नै लिएकी छन्। पपुलिष्टहरूलाई मन्त्रिपरिषद्मा समेट्ने प्रधानमन्त्रीको योजना छ। बालानन्द शर्मा, ओमप्रकाश अर्याल, कुलमान घिसिङ लगायतको नाम चर्चामा छ। त्यस्तै, निजामतिसेवा बाट अवकाश लिएका केही सचिव र केही कानून व्यबसायी समेत कार्कीको रोजाईमा छन्।  वरिष्ठ अधिवक्ता भीमार्जुन आचार्यलाई समेत मन्त्रीको प्रस्ताव पुगेको छ। त्यस्तै कलाकारितामा सक्रिय अर्का एक व्यक्तिले पनि मन्त्री नबन्ने भनिसकेका छन्।