सोसल मिडिया
युनिकोड
अन्तरिम सरकारको प्रधानमन्त्रीमा पूर्वप्रधानन्यायाधीश सुशीला कार्कीको नाम टुङ्गो लागिसके पनि संसद्लाई के गर्ने भन्ने विषयमा छलफल गर्न राष्ट्रपति रामचन्द्र पौडेलले जेनजी समूहसहित सम्बद्ध पक्षसँग छलफल गर्दैछन् । बिहान ९ बजेपछि शीतल निवासमा प्रधानसेनापति अशोकराज सिग्देलसहितको सहभागितामा छलफल हुने बताइएको छ ।
यसअघि बिहीबार दिउँसोदेखि अबेर रातिसम्म राष्ट्रपति पौडेलले विभिन्न पक्षसँग छलफल गरेका थिए । पूर्वप्रधानन्यायाधीश कार्कीलाई अन्तरिम सरकारको प्रधानमन्त्री बनाउन राजनीतिक दलहरू पनि सहमत भएका छन् । तर, संसद् विघटन गर्ने कि नगर्ने भन्ने विषयमा सहमति हुन बाँकी छ ।
आन्दोलनकारी पक्ष जेनजी समूहले संसद् विघटन गर्नुपर्ने अडान लिएको छ । तर, राजनीतिक दल, कानुनका विज्ञहरूले संसद जोगाएरै जेनजीका माग पूरा गर्न सकिने राय राष्ट्रपति पौडेललाई दिएका छन् ।
भदौ २३ र २४ गते चलेको दुई दिने जेनजी आन्दोलनले एमाले र कांग्रेसको नेतृत्वमा रहेको सरकार ढालिदिएको थियो । राजनीतिक दलका नेताहरू अहिले पनि सुरक्षित स्थानमा बसिरहेका छन् । यद्यपि, युवा संगठन र विद्यार्थीहरू हिजोदेखि सानै संख्यामा भए पनि सक्रिय देखिएका छन् । उनीहरूले संविधान जोगाउनुपर्ने माग गरेका छन् ।
यसैबीच छलफल निचोडमा पुगे राष्ट्रपतिले आजै अन्तरिम सरकारको प्रधानमन्त्रीमा सुशीला कार्कीलाई नियुक्त गर्ने सम्भावना छ । शपथ पनि आजै हुने शीतल निवास स्रोतले जनाएको छ ।
