सोसल मिडिया
युनिकोड
नेपाली कांग्रेसको १५ औँ राष्ट्रिय महाधिवेशन आज काठमाडौंको खुलामञ्चमा औपचारिक रूपमा सुरु हुँदैछ।
देशभर तथा प्रवासबाट आएका ७ हजार ५ सयभन्दा बढी महाधिवेशन प्रतिनिधिको सहभागिता रहने यस पाँचदिने महाकुम्भले पार्टीको नयाँ वैचारिक दिशा तय गर्दै नयाँ कार्यसमिति चयन गर्नेछ।
काठमाडौंको खुलामञ्चमा आज दिउँसो २ बजे भव्य समारोहका बीच नेपाली कांग्रेसको १५ औँ महाधिवेशनको औपचारिक उद्घाटन हुने तय भएको छ। पाँच दिनसम्म चल्ने यस महाधिवेशनको उद्घाटन सत्रलाई भव्य बनाउन खुलामञ्च परिसरलाई दुलहीझैँ सिंगारिएको छ भने सुरक्षा र प्राविधिक व्यवस्थापनलाई अन्तिम रूप दिइएको छ।
महाधिवेशनमा भाग लिन देशभरिका निर्वाचन क्षेत्र तथा जनसम्पर्क समितिहरूबाट ७ हजार ५ सयभन्दा बढी प्रतिनिधिहरू संघीय राजधानी काठमाडौं आइपुगिसकेका छन्। प्रतिनिधिहरूको आवास व्यवस्थापन काठमाडौंका विभिन्न होटलहरूमा गरिएको प्रवक्ता देवराज चालिसेले जानकारी दिए।
साथै महाधिवेशन प्रतिनिधिका लागि खानाको प्रवन्ध भृकुटीमण्डपमा मिलाइएको भोजन व्यवस्थापन समितिका संयोजक तिलक रानाभाटले बताए। उद्घाटन समारोहमा मुलुकका प्रमुख राजनीतिक दलका शिर्ष नेताहरूलाई आमन्त्रण गरिएको छ। कार्यक्रममा नेकपा एमालेका अध्यक्ष केपी शर्मा ओली, नेपाली कम्युनिस्ट पार्टीका अध्यक्ष पुष्पकमल दाहाल, राष्ट्रिय स्वतन्त्र पार्टीका सभापति रवि लामिछाने, राष्ट्रिय प्रजातन्त्र पार्टीका अध्यक्ष राजेन्द्र लिङदेन, जनता समाजवादी पार्टीका अध्यक्ष उपेन्द्र यादव र जनमत पार्टीका अध्यक्ष चन्द्रकान्त राउतलगायत नेताहरू सहभागी हुने निश्चित भएको छ।
यसैगरी भारत, चीन र अमेरिकासहित विभिन्न मुलुकका पार्टी प्रतिनिधि तथा कुटनीतिज्ञहरूलाई समेत निम्त्याइएको छ। जसमा सोसलिस्ट इन्टरनेसनलकी कार्यकारी संयोजक चन्ताल काम्बिवा काठमाडौं अवतरण गरिसकेका छन्। तालिकाअनुसार महाधिवेशनको बन्दसत्र असोज १९ र २० गते सञ्चालन हुनेछ। बन्दसत्रमा सभापति गगनकुमार थापाले समसामयिक राजनीतिक तथा नीतिगत दस्तावेज प्रस्तुत गर्नेछन्।
उपसभापति, महामन्त्री तथा कोषाध्यक्षले आ–आफ्ना प्रतिवेदन पेस गर्ने कार्यक्रम छ। बन्दसत्र सञ्चालनका लागि खुलामञ्चमै तीनवटा छुट्टाछुट्टै डोम–हल निर्माण गरिएका छन् भने पत्रकारका लागि मिडिया सेन्टर र आकस्मिक स्वास्थ्य उपचारका लागि हेल्थ डेस्कको व्यवस्था गरिएको छ।
पार्टीको नयाँ नेतृत्व चयनका लागि असोज १९ गते उम्मेदवारी दर्ता तथा मनोनयन तालिका तय गरिएको छ। मतदान प्रक्रिया भने असोज २१ र २२ गते सम्पन्न गरिनेछ। निर्वाचन समितिका सदस्य सचिव राजु कटुवालकाअनुसार मतदान कार्यलाई चुस्त र सहज बनाउन खुलामञ्च, राष्ट्रिय सभागृह र नेपाल प्रज्ञा प्रतिष्ठान गरी तीन फरक स्थानमा मतदान केन्द्रहरू तोकिएका छन्।
