कोशी प्रदेश सरकारमा नेपाली कम्युनिस्ट पार्टीका तर्फबाट सहभागी हुने मन्त्रीहरूको नाम टुंगो लगाएको छ। 

लामो समयको विवादपछि नेकपाले मन्त्रीहरूको सूची टुङ्गो लगाएको हो । नेकपाले जीवन आचार्यको नेतृत्वमा कोशी प्रदेश सरकारमा मन्त्रीहरू पठाएको छ । आचार्य पार्टी अध्यक्ष प्रचण्डका कान्छा ज्वाई हुन्। प्रचण्डको स्वकीय समेत रहेकी कान्छी छोरी गङ्गा दाहालका कान्छा श्रीमान् आचार्य यसअघि पनि पटक-पटक मन्त्री भएका थिए। यता दाहालमाथि भने अख्तियारले छानबिन गरिरहेको छ। 

नेकपाका अनुसार मन्त्रीका लागि आचार्य सहित, गम्बु शेर्पा, खिनु लङ्वा मन्त्री हुने छन् । यस्तै सपना दर्जीलाई राज्य मन्त्रीको रूपमा पठाएको छ । मन्त्रालयका विषयमा थप छलफल गर्न संसदीय दलका नेता इन्द्र आङवो मुख्यमन्त्री निवास पुगेका छन् ।

सरकारमा पठाएका मध्ये जीवन र खिनु यस अघि पनि मन्त्री भइसकेका छन् । गम्बु र सपना भने नयाँ अनुहार हुन् । एक जना मन्त्रीको भन अझै टुङ्गो लाग्न सकेको छैन। मन्त्रीलाई आजै सपथ गराउने कार्यक्रम रहेको बुझिएको छ।