प्रधानमन्त्री बालेन्द्र शाह ‘बालेन’लाई मेसेज गर्दा पक्राउ परेका सचिव कृष्णहरि पुष्कर बुधबारबाट अनिवार्य अवकाशमा गएका छन् । 

नेपाल सरकारका सचिव पुष्करले सचिव पदको पाँच वर्षे कार्यकाल पूरा गरी बुधबारदेखि अनिवार्य अवकाश पाएका छन् । प्रधानमन्त्री तथा मन्त्रिपरिषद् कार्यालयको अतिरिक्त (जगेडा) समूहमा रहेकै अवस्थामा उनी सेवाबाट बिदा भएका हुन् ।

पुष्कर २०७८ असार २४ गते सचिव पदमा बढुवा भएका थिए । निजामती सेवामा २०५३ माघ १७ गते बाट सुरु गरेका उनले सचिवका रूपमा अर्थ मन्त्रालय, राजस्व सचिव, सङ्घीय मामिला तथा सामान्य प्रशासन मन्त्रालय, श्रम, रोजगार तथा सामाजिक सुरक्षा मन्त्रालय र उपराष्ट्रपतिको कार्यालय जस्ता महत्त्वपूर्ण निकायहरूमा जिम्मेवारी सम्हालेका थिए ।

उपराष्ट्रपतिको कार्यालयमा कार्यरत रहँदा उनले राजदूत नियुक्तिको आवेदनका विषयमा जानकारी माग्दै प्रधानमन्त्री बालेन्द्र शाहलाई एसएमएस पठाएको आधारमा प्रहरीले उनलाई नियन्त्रणमा लिएर केही घण्टा सोधपुछ समेत गरेको थियो । 

उक्त घटनापछि सरकारले उनलाई प्रधानमन्त्री कार्यालयको अतिरिक्त समूहमा तानेको थियो र उनी कुनै जिम्मेवारीमा नफर्कीकनै अवकाशमा गएका हुन् ।

२०३१ साउन १३ गते जन्मिएका पुष्करले ५२ वर्ष नपुग्दै र ३० वर्षे सेवा अवधि पूरा नहुँदै सचिव पदबाट अवकाश पाएका हुन् ।