नेकपा (एमाले) का सांसद राजेन्द्र राईले सभामुख डोलप्रसाद (डीपी) अर्याललाई ‘कान सुन्नुहुन्छ कि हुन्न’ भन्ने प्रश्न गरेपछि संसदमा लफडा भएको छ । बुधबार प्रतिनिधिसभामा बोल्ने क्रममा एमाले सांसद राईले भने, ‘सम्माननीय सभामुख महोदय सम्माननीय सभामुखलाई एउटा निवेदन गर्नुपर्‍यो तपाईं कान सुन्नुहन्छ कि हुन्न ? मेरो सभामुखलाई निवेदन हो ।’

सांसद राईले यति भनेपछि सभामुख अर्यालले रोके । ‘माननीय सदस्य मर्यादामा बस्नुहोला माननीय सदस्यलाई योभन्दा अगाडि बढ्नलाई म निर्देशन दिदिनँ समय दिदिनँ बस्नुस् । माननीय सदस्य बस्नुस् । माननीय सदस्यले सभामुखको अवहेलना गर्दै हुनुहुन्छ । सभाको अवहेलना गर्दै हुनहुन्छ बस्नुस्,’ सभामुख अर्यालले भने ।

त्यसपछि सभामुख अर्यालले सांसद पर्शुराम तामाङलाई समय दिए । त्यसपछि एमाले सांसदहरूले आसनबाट उठेर विरोध गरे । सभामुख अर्यालले राईले प्रयोग गरेको शब्दमा गम्भीर ध्यानाकर्षण भएको बताएका छन् ।

एमाले सांसदहरूले उठेर विरोध गरेपछि सभामुख अर्यालले संसद सचिवालयका कर्मचारीसँग कुराकानी गरेका थिए । यहीबीचमा रास्वपाकी सांसद टीका संग्रौला (ज्वाला) ले समय माग गर्छिन् । सांसद ज्वालाले संसद बैठकको पहिलो दिनको दृश्य स्मरण गरिन् । उनले प्रतिपक्षी बेन्चका अनुभवी सांसदहरूले लोकतान्त्रिक चरित्र र बहस सिकाउने अपेक्षा गरेको भए पनि त्यसो हुन नसकेको भनाइ राखिन् ।

‘यहाँ कहिले जिउँदा युवाहरूलाई लास भनिन्छ, भने कहिले सभामुखलाई नै कान सुन्नु हुँदैन भन्ने व्याख्या गरिन्छ । नियमावलीको नियम २१ को (ख) मा प्रस्ट लेखिएको छ । आँखा देख्नुहुन्छ कि हुँदैन भनेर हामीले प्रश्न गर्न पाउनपर्छ कि पर्दैन यो प्रश्न प्रतिपक्षी बेन्चका दीग्गज नेताहरूलाई प्रश्न गर्न चाहन्छु,’ उनले भनिन् ।

सांसद ज्वालाले सांसद राईको अभिव्यक्ति संसदको रेकर्डबाट हटाउन माग गरिन् । नहटाउने हो भने प्रतिपक्षी सांसद कस्ता आए भनेर इतिहासलाई देखाउन राख्नुपर्ने तर्क उनको थियो ।

सभामुखले नियमावलीको नियम २१ को खण्ड (घ) तर्फ ध्यानाकर्षण गराए । उनले सांसद राईलाई शब्द सच्याउने समय दिए । समय पाएपछि सांसद राईले सभामुखको गरिमामय संसदमा आत्तिएका बताए । त्यसपछि सभामुख अर्यालले विषयमा प्रवेश गर्न ध्यानाकर्षण गराए ।

गरिमामय संसदमा आत्तिएर एउटा सदस्यले कुरा समयमा जुन व्यवहार गर्नभयो नि तपाईंले पाँच वर्ष सदन चलाउनहुन्न सभामुख महोदय । मैले बुझिसकेँ मैले खुट्टा हेरिसकेँ । किन हेरेँभन्दा पनि तपाईँले कुरा सुन्न परेन । नसुनिकन तपाईँले एकैचोटी भन्न मिल्छ ?,’ सांसद राईले भने ।

त्यसपछि सभामुख अर्यालले १५ मिनेटको लागि संसद बैठक स्थगित गरे ।