वैदेशिक रोजगार विभागका निर्देशक उपसचिव टीकाराम ढकाल सहित चारजना विरुद्ध अख्तियार दुरुपयोग अनुसन्धान आयोगले मुद्या दायर गरेको छ । सुर्खेत उपत्यका नगर विकास समिति, वीरेन्द्रनगरसँग सम्बन्धित पदाधिकारी तथा कर्मचारीविरुद्ध करिब ३ करोड रुपैयाँ बराबरको राजस्व अनियमितता गरेको आरोपमा विशेष अदालतमा भ्रष्टाचार मुद्दा दर्ता गरेको छ ।

आयोगद्वारा जारी विज्ञप्तिअनुसार सटर, कवल तथा जग्गा भाडाबाट संकलित रकम बैंक खातामा जम्मा नगरी अपचलन गरिएको निष्कर्ष अनुसन्धानबाट निकालिएको हो । समितिबाट प्राप्त विवरण र उजुरीका आधारमा छानबिन गर्दा कर्मचारीहरूको मिलेमतोमा ठूलो रकम हिनामिना भएको देखिएको जनाइएको छ ।

अनुसन्धानमा समितिका तत्कालीन सदस्य सचिव टिकाराम ढकाल, नरहरी तिवारी र गेहेन्द्रबहादुर डाँगी, लेखा अधिकृत स्वर्गीय हरिबहादुर क्षत्री तथा सहलेखापाल खड्कबहादुर राना संलग्न रहेको उल्लेख गरिएको छ । ढकाल वैदेशिक रोजगार विभागमा कार्यरत छन् ।

उनीहरूले आर्थिक वर्ष २०७६/७७ देखि २०८०/८१ सम्म विभिन्न भाडा शीर्षकबाट ४ करोड १८ लाखभन्दा बढी रकम उठाएको देखिएको छ ।

तर कानुनअनुसार सम्पूर्ण राजस्व बैंक खातामा दाखिला गर्नुपर्ने भए पनि जम्मा १ करोड २३ लाख रुपैयाँ मात्र खातामा राखिएको र बाँकी २ करोड ९४ लाख ७८ हजार रुपैयाँभन्दा बढी रकम अपचलन गरिएको आरोपपत्रमा उल्लेख छ ।

आयोगका अनुसार उक्त रकम बैंकमा जम्मा भएको देखाउन नक्कली तथा भ्रामक आयव्यय विवरण तयार गरिएको थियो । ती कागजात समितिको बैठकमा अनुमोदनका लागि पेश गरी निर्णयसमेत गराइएको तथ्य अनुसन्धानबाट खुलेको बताइएको छ ।

भ्रष्टाचार निवारण ऐन, २०५९ अन्तर्गत कसुर पुष्टि हुने आधार भेटिएको भन्दै आयोगले सम्बन्धित पदाधिकारी तथा कर्मचारीमाथि कानुनी कारबाही र सजायको मागसहित विशेष अदालतमा मुद्दा दायर गरेको जनाएको छ ।