सोसल मिडिया
युनिकोड
निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले आगामी निर्वाचन मुलुकको सुशासन र संविधानको रक्षाका लागि निर्विकल्प रहेको बताएका छन् । आइतबार आयोजित एक कार्यक्रममा भण्डारीले निर्वाचनको मिति तोकिएपछि विभिन्न संशय र हल्ला फैलाइए पनि मतदान प्रक्रिया कुनै हालतमा नरोकिने बताए ।
निर्वाचनको विकल्प निर्वाचन नै भएको उनको भनाइ छ । केही कुण्ठित तत्त्वहरूले निर्वाचन रोकिन्छ कि भन्ने भ्रम फैलाउन खोजेको उनको आरोप छ । "केही कुण्ठित तत्त्वहरूले निर्वाचन रोकिन्छ कि भन्ने भ्रम फैलाउन खोजेका छन्, तर नेपाली जनता कसैको कुण्ठा पूर्ति गर्ने साक्षी बस्दैनन्," भण्डारीले भने, "२१ गते बिहान ७ बजेदेखि बेलुका ५ बजेसम्म मतदान भएरै छाड्छ ।"
आयोगले निर्वाचनको व्यवस्थापकीय पाटो हेर्ने भए पनि निर्वाचनको माहोल सिर्जना गर्ने र मतदातालाई सुसूचित गर्ने मुख्य जिम्मेवारी सञ्चारकर्मीको रहेको उनको भनाइ थियो । उनले निर्वाचनको निष्ठामा खलल नपुर्याउन पनि आग्रह गरे ।
यसपटकको निर्वाचनमा ९ देखि १० लाख नयाँ मतदाता थपिनुलाई उनले सकारात्मक परिवर्तनको रूपमा अर्थ्याए । थपिएका मतदातामा युवाहरूको बाहुल्यता रहेको र उनीहरू सुशासनको खोजीमा निर्वाचन प्रक्रियामा सहभागी हुन उत्सुक रहेको उनको भनाइ छ । "युवाहरूको यो जोस र उत्साहले नेपालमा सुशासन प्रवाह गर्ने मार्ग प्रशस्त गर्नेछ," उनले भने ।
राजनीतिक विद्रोह र प्रतिनिधिसभा विघटनपछिको जटिल परिस्थितिमा हुन लागेको यो निर्वाचनले मुलुकलाई ठीक ट्र्याकमा ल्याउने उनको भनाइ छ । "यो शताब्दीकै पेचिलो निर्वाचन भए पनि हामीले यसलाई सरल बनाइसकेका छौँ । निर्वाचनपछि आउने प्रतिनिधिहरूले जनमतको कदर गर्दै मुलुकमा शान्ति र सुशासन कायम गर्नेछन्," उनले भने ।
