सम्पत्ति शुद्धीकरण तथा आतंकवादी क्रियाकलापमा वित्तीय लगानी निवारण (एएमएल तथा सिएफटी) सँग सम्बन्धित समसामयिक विषयहरूमा केन्द्रित दुई दिने अन्तर्राष्ट्रिय सम्मेलन बुधबारदेखि काठमाडौंमा सुरु भएको छ । नेपाल राष्ट्र बैंक सम्पत्ति शुद्धीकरण निवारण सुपरिवेक्षण महाशाखाद्वारा आयोजित यस सम्मेलनको उद्घाटन गभर्नर प्रा.डा. विश्वनाथ पौडेलले गरे ।

उद्घाटन सत्रलाई सम्बोधन गर्दै गभर्नर पौडेलले नेपाल वित्तीय कार्यदलको ग्रे लिस्टमा परेको वर्तमान अवस्थामा सम्पत्ति शुद्धीकरण निवारणका आन्तरिक संयन्त्रहरूलाई थप सुदृढ र सबल बनाउनुपर्ने धारणा राखे । “ग्रे लिस्टमा पर्नु चुनौती भए तापनि यसले हामीलाई आन्तरिक संयन्त्रलाई पारदर्शी र विश्वव्यापी मापदण्ड अनुसार परिमार्जन गर्न महत्त्वपूर्ण पाठ सिकाएको छ,” उनले भने ।

गभर्नर पौडेलले वित्तीय अपराध विरुद्धको लडाइँ कुनै एउटा निकायको मात्र जिम्मेवारी नभई बैंकिङ, बीमा, पुँजी बजार, र सहकारी लगायतका सबै सरोकारवाला निकायहरूको साझा प्रतिबद्धता र सहकार्यबाट मात्र सफल हुने स्पष्ट पारे ।

विज्ञहरूको सहभागिता र कार्यपत्र प्रस्तुति सम्मेलनमा नेपालसहित भारत, बंगलादेश, श्रीलंका र मंगोलियाका विषय विज्ञहरूको सहभागिता रहेको छ । कार्यक्रमको पहिलो दिन नेपाल राष्ट्र बैंकका उपनिर्देशक अभियान उपाध्यायले नेपालमा (एएमएल तथा सिएफटी) को वर्तमान अवस्था र पारस्परिक मूल्याङ्कन २०२३ बारे कार्यपत्र प्रस्तुत गरे । त्यस्तै, श्रीलंकाको वित्तीय जानकारी एकाइका वरिष्ठ सहायक निर्देशक सुपुन गुणासेकराले व्यापार र सेवामा आधारित सम्पत्ति शुद्धीकरणका चुनौतीहरूबारे प्रकाश पारे ।

सम्मेलनमा प्रधानमन्त्री तथा मन्त्रिपरिषद्को कार्यालय, विभिन्न मन्त्रालय, र नियामक निकायका प्रतिनिधिहरूले सम्पत्ति शुद्धीकरण निवारणका नियामक, सुपरिवेक्षकीय र न्यायिक दृष्टिकोणका बारेमा गहन छलफल गरिरहेका छन् ।

दोस्रो दिनको कार्यतालिकाअनुसार भोलि (बिहीबार) हुने दोस्रो दिनको सत्रमा भारतीय रिभर्ज बैंकका विज्ञ विजय रैनाले सुपरिवेक्षणमा प्रविधिको प्रयोग र डाटा एनालिटिक्सबारे प्रस्तुति दिने  राष्ट्र बैंकले जनाएको छ । साथै, मंगोलियाका विज्ञ नोमुन्दारी बाट्सुखले आफ्नो देश कसरी ग्रे लिस्टबाट हट्न सफल भयो भन्ने अनुभव र नेपालले सिक्नुपर्ने पाठबारे कार्यपत्र प्रस्तुत गर्ने कार्यक्रम छ ।

नेपाल ग्रे लिस्टबाट बाहिर निस्कनका लागि कानुनी तथा नीतिगत व्यवस्थाको प्रभावकारी कार्यान्वयन र क्षमता विकासमा यो सम्मेलन परिणाममुखी हुने अपेक्षा गरिएको छ । सम्मेलनको समापन सम्पत्ति शुद्धीकरण निवारण सुपरिवेक्षण महाशाखाका प्रमुख आर्या जोशीको मन्तव्यसँगै हुने जनाइएको छ ।