नेपाली कांग्रेसले पार्टीको केन्द्रीय अनुशासन समिति गठन गरेको छ। पार्टीको केन्द्रीय कार्यसम्पादन समितिको आइतबार बसेको भर्चुअल बैठकले केन्द्रीय सदस्य तारामान गुरुङको संयोजकत्वमा अनुशासन समिति गठन गरेको हो।

समितिको सदस्यमा धना खतिवडा तथा सुवासकुमार पोखरेल छन्। पार्टीको विधान २०१७ (संशोधनसहित) को धारा ३४ को उपधारा (७) अनुसार ३ सदस्यीय केन्द्रीय अनुशासन समिति गठन गरिएको कांग्रेसले जनाएको छ।

सभापति गगनकुमार थापाको सभापतित्वमा बसेको बैठकमा महामन्त्री गुरुराज घिमिरेले प्रस्ताव पेस गरेका थिए।

बैठकले उपसभापति विश्वप्रकाश शर्माले प्रस्तुत गरेको नेपाली कांग्रेस प्रतिनिधिसभा निर्वाचन परिचालन निर्देशिका–२०८२ र नेपाली कांग्रेस सार्वजनिक कार्यक्रम व्यवस्थापन निर्देशिका–२०८२ लाई संशोधनसहित पारित गरेको कार्यवाहक मुख्यसचिव कृष्णप्रसाद दुलालले जानकारी दिएका छन्।

बैठकमा उपसभापति पुष्पा भुसालसहित सहमहामन्त्रीहरू फरमुल्लाह मन्सुर, डिला संग्रौला, मुक्ताकुमारी यादव, उदयशमशेर राणा, योगेन्द्र चौधरी र प्रवक्ता देवराज चालिसेले धारणा राखेका थिए।