राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आफ्नो पार्टी कुनै विदेशी शक्तिको आशीर्वाद वा कसैको ‘जुठो कुरो’ खाएर बनेको पार्टी नभएको बताएका छन् । काठमाडौं निर्वाचन क्षेत्र नम्बर २ बाट पार्टी उम्मेदवार बनेका नेतृ कुन्ती पोखरेलको घरदैलो कार्यक्रमलाई सम्बोधन गर्दै उनले राप्रपा नेपाली माटोमा संघर्षबाट जन्मिएको बताए ।

लिङदेनले राप्रपालाई निषेध गरेर जान सकिन्छ भन्ने भ्रम नपाल्न चेतावनी दिँदै व्यवसायी तथा अभियन्ता दुर्गा प्रसाईंमाथि सरकारले पटक–पटक गरिरहेको अवरोध र पक्राउको निन्दा गरे । उनले सरकारले नियतवश नै प्रसाईंलाई निरुत्साहित पार्न खोजेको आरोप लगाए । संविधानले वाक स्वतन्त्रता, हिँडडुलको स्वतन्त्रता र विरोध गर्ने अधिकार सुनिश्चित गरेको भन्दै उनले शान्तिपूर्ण ढंगले निर्वाचन बहिष्कार गर्छु वा विरोध गर्छु भन्न पाउने नागरिकको मौलिक अधिकार भएको जिकिर गरे ।

दुर्गा प्रसाईमाथि सरकारले ज्यादती गरेको भन्दै त्यसको भत्र्सना समेत गरे । देशमा बढ्दो अतिवाद र विदेशी हस्तक्षेपप्रति चिन्ता व्यक्त गर्दै लिङ्देनले निर्णायकत्व नेपालीकै हातमा हुनुपर्नेमा जोड दिए । उनले आगामी प्रधानमन्त्री को हुने भन्नेकुरा समेत विदेशीले मिलाइदिन थालेको टिप्पणी गरे । अध्यक्ष लिङदेनले मतदाताहरूलाई फेसबुक, रिल र टिकटकका आधारमा धारणा नबनाई देशको भविष्यलाई केन्द्रमा राखेर सोच्न आग्रह गरे ।

‘राष्ट्रिय प्रजातन्त्र पार्टीलाई कसैले कमजोर नठाने हुन्छ । यो पार्टी कुनै विदेशीहरुले बनाइदिएको राजनीतिक पार्टी होइन । कसैको जुठो कुरो खाएर विदेशीहरुको आशिर्वादबाट बनेको पार्टी होइन । नेपाली धर्तीमा उत्पन्न भएको र संघर्षबाट निर्माण भएको पार्टी हो । र त्यस प्रकारका सबै चुनौतीहरुको सामना गर्ने सामथ्र्यका साथ तयार भएको हुनाले राष्ट्रिय प्रजातन्त्र पार्टीलाई जिस्काउने प्रयास कसैले नगर्नु भनेर म भन्न चाहन्छु,’ उनले भने ।

उनले काठमाडौं क्षेत्र नं. २ बाट पार्टीको प्रतिनिधिसभा सदस्य उम्मेदवार कुन्ती पोखरेलको पक्षमा मत माग्दै पोखरेल निष्ठावान र सेवामा समर्पित व्यक्तित्व भएको दाबी गुरे । पोखरेललाई मतदान गर्नु भनेको एउटा व्यक्तिलाई मात्र नभई देश र धर्म जोगाउने अभियानमा सहभागी हुनु भएको उनको तर्क छ । लिङदेनले निर्वाचन आयोगको आचारसंहिताको सम्मान गर्दै मतदाताहरूलाई ‘हलो’ चिन्हमा मतदान गर्न सांकेतिक रुपमा आग्रह गरे ।