सोसल मिडिया
युनिकोड
काठमाडौं उपत्यका खानेपानी लिमिटेड (केयूकेएल)ले मेलम्चीको पानी सुचारु गर्न प्रयासरत रहेको जनाएको छ । केयूकेएलका प्रवक्ता प्रकाश कुमार राईले आफूहरू सम्बन्धित पक्षसँग छलफलमा रहेको र वार्ता सकारात्मक बनिरहेको जानकारी दिए ।
“हामी सम्बन्धित पक्षसँग वार्तामा बसिरहेका छौँ । केही वार्ता सकारात्मक भएका छन् । सके छिट्टै मेलम्चीको पानी वितरण गर्ने हाम्रो प्रयास छ,” उनले भने ।
केयूकेएलले मेलम्चीको पानी वितरण कार्य सुचारु गरेपछि कतिपय स्थानमा पुरानो धाराको लाइन काटिदिँदा पनि सर्वसाधारण पानीबाट थप वञ्चित भएका छन् ।
स्थानीयको अवरोधका कारण सिन्धुपाल्चोकको हेलम्बु गाउँपालिका–१, अम्बाथानस्थित सुरुङबाट गत बिहीबार (कात्तिक २०)देखि पानी पठाउन नै रोकिएको छ ।
आन्दोलित स्थानीय सरोकार समितिले मेलम्ची खानेपानी विकास समितिको नयाँ गठन आदेशले प्रभावित क्षेत्रमा रोकिएको सामाजिक उत्थान कार्यक्रम पुनः सञ्चालन गर्नुपर्ने माग राखेको छ ।
त्यस्तै, आयोजनाको ठेकेदार कम्पनी इटालियन फर्म सीएमसीले स्थानीय व्यवसायीबाट उधारोमा खरिद गरेका सामग्रीको भुक्तानी नगरी ०७५ सालमा आयोजना छाडेर हिँडेपछि आपूर्तिकर्ता पनि आन्दोलित छन् । उनीहरूले मुहान क्षेत्रमा अवरोध गर्दै आएका छन् ।
