नक्कली भुटानी शरणार्थी ठगी प्रकरणमा संलग्न रहेको आरोप लागेका थप एक प्रतिवादी पक्राउ परेका छन् । नेपाल प्रहरीको केन्द्रीय अनुसन्धान ब्युरो (सीआईबी)ले रौतहटको फतुवा हर्साह–९ का ४२ वर्षीय निरन्जनकुमार खरेललाई पक्राउ गरेको हो ।

ब्युरोका अनुसार, उनलाई गोप्य सूचनाको आधारमा गत शुक्रबार (कात्तिक २१ गते) पक्राउ गरिएको हो । पक्राउ परेका खरेललाई आवश्यक कारबाहीका लागि काठमाडौं जिल्ला अदालत पेस गरिएको छ ।

ब्युरोका प्रवक्ता, प्रहरी वरिष्ठ उपरीक्षक (एसएसपी) शिवकुमार श्रेष्ठका अनुसार, खरेलले ठगी कसुरमा संकलन भएको नगद तथा चेक जम्मा गर्ने, ओसारपसार गर्ने र पीडितहरूबाट असुल गरिएको रकम लिने गिरोहसँग मिलेमतो गरेको अनुसन्धानबाट खुलेको थियो । उनी लामो समयदेखि फरार थिए ।

खरेलमाथि ठगी, लिखत कीर्ते, राज्यविरुद्ध र संगठित अपराधसम्बन्धी कसुर छ ।