मुस्ताङको कोरला नाकाबाट अध्यागमन सेवा सुरु गरिएको छ । कार्यालय उद्घाटन भएको १ वर्षपछि सेवा सञ्चालनमा ल्याइएको हो ।

तत्कालीन गृहमन्त्री रमेश लेखकले २०८१ कात्तिक १४ मा कोरलास्थित अध्यागमन कार्यालयको उद्घाटन गरेका थिए । अध्यागमन कार्यालय परिसरमा बाक्लो हिउँ परेका कारण हाल ल्होमान्थाङ इलाका प्रशासन कार्यालयबाट सेवा सुरु गरिएको हो ।

शनिबार १३ जना नेपाली नागरिकहरू त्यहाँबाट चीनतर्फ प्रस्थान गरेका छन्।  चीन प्रस्थान गर्नेमा ल्होमान्थाङ गाउँपालिकाका अध्यक्ष सहित १३ जना रहेको अध्यागमन विभागका निर्देशक टीकाराम ढकालले बताए। 

चीनको अध्यागमनले पनि कोरालाबाट राहदानी र भिसा जारी गर्न थालेको छ । सरकारले माथिल्लो मुस्ताङ क्षेत्रलाई निषेधित क्षेत्र घोषणा गरेको हुनाले सो क्षेत्रमा प्रवेश गर्दा वा पदयात्रा गर्दा पहिलो १० दिनको लागि ५ सय अमेरिकी डलर तिर्नुपर्छ ।

नेपाल सरकारले चिनियाँ पर्यटकलाई एक भिसा वर्षमा १५० दिन निःशुल्क उपलब्ध गराउँदै आएको छ । निषेधित क्षेत्रमा प्रवेश गर्दाचाहिँ चिनियाँ नागरिकले पनि ५ सय अमेरिकी डलर शुल्क बुझाउनुपर्छ । त्यहाँको अध्यागमन प्रमुख उपसचिव छन्।