अख्तियार दुरुपयोग अनुसन्धान आयोगले जाजरकोटको भेरी नगरपालिकाको सडक निर्माण ठेक्का प्रक्रियामा अनियमितता भएको भन्दै सात जनाविरुद्ध विशेष अदालत काठमाडौंमा भ्रष्टाचार मुद्दा दायर गरेको छ ।

भेरी नगरपालिकाको कारागार रानागाउँ-नेटबजार सडक निर्माण आयोजनाको ठेक्कामा अनियमितता भएको ठहर गर्दै आयोगले सोमबार आरोपपत्र दायर गरेको हो । करिब २ करोड ८० लाख लागतको उक्त आयोजनामा बोलपत्र प्रक्रिया पारदर्शी नभएको र निश्चित ठेकेदारलाई फाइदा पुग्ने गरी ठेक्का दिइएको अख्तियारको दाबी छ । 

२०८० फागुन २० गते ‘थापा र सविन र सुदर्शन जेभी’ सँग २ करोड ६९ लाख ५५ हजार २३३ रुपैयाँमा ठेक्का सम्झौता भएको थियो । तर, ठेकेदार कम्पनीले आवश्यक औसत वार्षिक कारोबार ७० प्रतिशत नपुगेको र साइट भिजिट प्रमाणपत्रसमेत नबुझाए पनि योग्य ठहर गरिएको अख्तियारले जनाएको छ । सार्वजनिक खरिद ऐन, २०६३ र नियमावली, २०६४ को उल्लङ्घन गरी ठेक्का प्रक्रिया हेरफेर गरेको अभियोगमा नगरपालिकाका तत्कालीन र हाल कार्यरत कर्मचारी तथा ठेकेदार कम्पनीका प्रतिनिधिमाथि मुद्दा दायर भएको छ ।

आरोपितमा तत्कालीन प्रमुख प्रशासकीय अधिकृत दलबहादुर घर्ती, इन्जिनियर मोहन मल्ल, विकास अधिकृत अनिस शाह, कानुन अधिकृत प्रकाश शाही, लेखापाल राजेन्द्र कठायत, नायब सुब्बा कृति थापा र ठेकेदार कम्पनीका प्रतिनिधि दिपक खत्री छन् । आयोगले ८१ लाख ५३ हजार ६३० रुपैयाँ बिगो कायम गरी भ्रष्टाचार निवारण ऐन, २०५९ बमोजिम कैद र जरिवाना माग गरेको प्रवक्ता राजेन्द्र पौडेलले बताए ।