विद्यालय शिक्षा विधेयकका विवादित दफामाथि संसदीय समितिमा छलफल हुँदै छ । शिक्षा, स्वास्थ्य तथा सूचना प्रविधि समितिको बैठकमा विवादित विषयमा सहमतिको प्रयास हुन लागेको हो । 

आजको समिति बैठकबाट विधेयक पारित गर्ने तयारी छ । समिति बैठक दिउँसो २ बजे बस्दै छ । 

समितिका सभापति अम्मरबहादुर थापाका अनुसार, केही विवादित दफाहरूमा सहमति जुटिसकेको छ । “हिजोको परामर्श उपसमितिको बैठकमा केही विवादित दफाहरू मिलेका छन्,” थापाले भने, “आज समितिको बैठकले थप छलफल गरेर पारित गर्छ । समितिबाट पारित भएपछि प्रतिवेदन बनाएर प्रतिनिधिसभामा पेस हुन्छ ।” 

यी हुन् विवादित दफा :–  

पूर्वप्राथमिक शिक्षा (ईसीडी) कार्यकर्तालाई शिक्षक मान्ने/नमान्ने, ईसीडीलाई स्थानीय तहमा राख्ने/नराख्ने, आन्तरिक र बाह्य पदपूर्तिको ६०/४० र शिक्षकतर्फबाट ७५/२५ को अडानमा विवाद छ । 

आवधिक बढुवा, शिक्षकहरूको कार्यसम्पादन मूल्यांकनको नम्बरलगायत विषयमा सहमति जुट्न सकेको छैन ।

गत चैत २० गतेदेखि शिक्षकले शिक्षा ऐन जारी गर्नुपर्ने माग राखेर काठमाडौंको माइतीघर–बबरमहल–बानेश्वरकेन्द्रित सडक आन्दोलन गरेका थिए ।

त्यसपछि वैशाख १७ गते सरकारले नेपाल शिक्षक महासंघसँग असार १५ भित्र विधेयक पारित गर्ने प्रतिबद्धतासहित नौबुँदे सहमति गरेको थियो ।

महसंघले समितिको बैठकले लिने निर्णयको आधारमा आगामी रणनीति बनाउने जनाएको छ ।