सोसल मिडिया
युनिकोड
नाबालिकामाथि जबरजस्ती करणी गरेको अभियोग लागेका झापाको बिर्तामोड नगरपालिकाका पूर्वमेयर ध्रुवकुमार शिवाकोटीलाई अदालतले २० लाख धरौटीमा रिहा गर्न आदेश दिएको छ ।
उच्च अदालत विराटनगर, इलाम इजलासमा सुनुवाइ गर्दै न्यायाधीशद्वय किरणकुमार पोखरेल र रेखा थापा पाण्डेले बिहीबार शिवाकोटीलाई धरौटीमा छाड्न आदेश दिएका हुन् ।
यसअघि जिल्ला अदालतले घरेलु कामदारका रूपमा रहेकी एक १५ वर्षीया नाबालिकालाई पटक–पटक जबरजस्ती करणी गरेको अभियोगमा शिवाकोटीलाई पुर्पक्षका लागि थुुनामा पठाउन आदेश दिएको थियो । जिल्ला अदालत झापाले शिवाकोटीलाई ०८१ पुस २२ गते ‘निर्दोष हुन् भन्न सकिने स्थिति नभएको’ भन्दै पुर्पक्षमा पठाएको हो ।
तर, शिवाकोटी तीन महिनासम्म बिर्तामोडको बीएन्डसी अस्पतालमा बसेका थिए । ‘बेरीतको आदेश बदर गरिपाऊँ’ भन्दै शिवाकोटीले उच्च अदालतमा निवेदन दिएका थिए । बिहीबार उच्च अदालतले उनलाई धरौटीमा छाड्ने आदेश दिएको हो ।
बालिकालाई पटक–पटक जबरजस्ती करणी गरेको अभियोग शिवाकोटीमाथि लागेको थियो । बालिकाले ‘पहिले यसबारे कहिल्यै नभनेको, तर आफन्त नेपाल नामक संस्थाको सम्पर्कमा आएपछि मात्रै यसबारे भन्न थालेको’ अदालतको आदेशमा उल्लेख छ ।
बालिकामाथि तीन वर्षदेखि करणी हुँदै आएको भन्दै उनकी हजुरआमाले किटानी जाहेरी दिएकी थिइन् । ०८१ मंसिर १५ को जबरजस्ती करणीको वारदात देखाई ०८१ मंसिर २४ मा जाहेरी परेको देखिन आएको अदालतले उल्लेख गरेको छ ।
पीडित बालिकाको स्वास्थ्य परीक्षण गर्ने विशेषज्ञको रायमा ‘हिस्ट्री एन्ड एक्जामिनेसन डज नट एड्ज्याक्टली म्याच’ भन्ने उल्लेख भएको अदालतको आदेशमा उल्लेख छ ।
