सोसल मिडिया
सम्पर्क
युनिकोड
नेपालका लागि नवनियुक्त भारतीय राजदूत सुधाकर दलेलाले शुक्रबार सिंहदरबारमा संस्कृति, पर्यटन तथा नागरिक उड्डयन मन्त्री खडकप्रसाद पौडेल र पूर्वाधार विकास मन्त्री सुनिल लम्सालसँग भेटवार्ता गरेका छन् ।
कार्तिक महिनामा जोगी समुदायले लगाउने फेरीकै भाकामा दलेलाले भेटघाट तीब्र पारेका हुन् ।
काठमाडौँस्थित भारतीय दूतावासका अनुसार मन्त्री पौडेलसँगको भेटमा पर्यटन प्रवर्द्धन, नेपाल र भारतबीचको सम्पर्क सञ्जाल विस्तार तथा दुवै देशका नागरिकबीचको सम्बन्ध थप सुदृढ बनाउने विषयमा कुराकानी भएको थियो ।
मन्त्री लम्सालसँग दलेलाले पूर्वाधार विकास र सम्पर्क सञ्जालका क्षेत्रमा द्विपक्षीय सहकार्य बढाउने उपायबारे छलफल गरेका थिए । भेटमा विभिन्न क्षेत्रमा नेपाल-भारत साझेदारी अघि बढाउन मिलेर काम गर्ने विषयमा पनि कुराकानी भएको दूतावासले जनाएको छ ।
त्यस्तै, परराष्ट्रसचिव अमृतबहादुर राईसँग नेपालका लागि भारतीय राजदूत सुधाकर दलेलाले आजै भेटवार्ता गरेका छन्। परराष्ट्र मन्त्रालयमा भएको भेटमा सचिव राईले नवनियुक्त भारतीय राजदूत दलेलालाई कार्यकालको सफलताको शुभकामना र बधाइ दिएका थिए।
भेटका क्रममा विविध विषयमा छलफल भएको परराष्ट्र मन्त्रालयले जनाएको छ।
उनीहरुबीच दुवै देश र जनताका बहुलाभका लागि नेपाल भारत सम्बन्धलाई थप मजबुत बनाउने र सहकार्य बढाउनेबारे छलफल भएको थियो।
