पछिल्लो एक वर्षमा वैदेशिक रोजगार सम्बन्धी ठगी घटनाका पीडितले साढे ४३ करोड रुपैयाँ क्षतिपूर्ति पाएका छन् । चालु आर्थिक वर्षमा पीडितहरूले सो क्षतिपूर्ति पाएका हुन् ।

वैदेशिक रोजगार विभागका अनुसार २०८२ साउन १ गतेदेखि २०८३ असार २० गतेसम्मको अवधिमा वैदेशिक रोजगारपीडितलाई कुल ४३ करोड ४१ लाख ५९ हजार ३०४ रुपैयाँ क्षतिपूर्ति रकम उपलब्ध गरिएको हो ।

आर्थिक वर्ष २०८२/८३ को साउनदेखि चैतसम्म नौ महिनामा ८८२ वटा संस्थागत उजुरी र व्यक्तिगत मुद्दामा अनुसन्धान भएको थियो । ती मुद्दामा १२ करोड ६७ लाख ३९ हजार क्षतिपूर्ति भराइएको थियो ।

पछिल्लो तीन महिना अर्थात् २०८३ वैशाख १ गते यताको अवधिमा एक हजार चारवटा संस्थागत उजुरी र व्यक्तिगत मुद्दाको अनुसन्धान भएको थियो । ती मुद्दामा मेलमिलापमार्फत ३० करोड सात लाख ४२ हजार ३०० रुपैयाँ पीडितलाई उपलब्ध गरिएको छ । 

पछिल्लो तीन महिनामा मुद्दा अनुसन्धान र फछ्र्यौट दर २४१.५ प्रतिशतले वृद्धि भएको विभागले जनाएको छ । सोही अवधिमा वैदेशिक रोजगारपीडितले क्षतिपूर्ति प्राप्त गर्ने दर ६७२.८ प्रतिशतले वृद्धि भएको विभागको दाबी छ ।