स्तन तथा पाठेघरको मुखको क्यान्सरको निःशुल्क परीक्षण तथा प्रारम्भिक उपचार सेवा प्रदान गर्ने उद्देश्यले काठमाडौं महानगरपालिकाले वीर अस्पतालसँग सम्झौता गरेको छ । महानगरले महिलाको स्वास्थ्य सुरक्षालाई प्राथमिकता दिँदै उक्त सेवा सुरु गर्न लागेको हो ।

विशेष गरी कामकाजी महिला र गृहिणीलाई सहज हुने गरी परीक्षण तालिका व्यवस्थापन गर्न कार्यवाहक प्रमुख सुनिता ढंगोलले निर्देशन दिएकी छन् ।

सम्झौताअनुसार, परीक्षणका क्रममा महिलाको स्तनको क्लिनिकल जाँच गरिनेछ । प्रारम्भिक जाँचमा शंका लागेमा अल्ट्रासाउन्ड गरिनेछ । आवश्यकताअनुसार मेमोग्राफीका निम्ति पठाइने व्यवस्था गरिएको छ ।

यस्तै, पाठेघरको मुखको क्यान्सरअन्तर्गत एचपीभी डीएनए पीसीआर (ह्युमन प्यापिलोमा भाइरस) परीक्षण गरिनेछ । उक्त परीक्षणमा पोजिटिभ रिपोर्ट आएमा थप पुष्टि गर्न कल्पोस्कोपी र बायोप्सी गरिनेछ ।

महानगरपालिकाले यो कार्यक्रममार्फत प्रारम्भिक चरणमै क्यान्सर पहिचान गरी समयमै उपचार सम्भव हुने विश्वास लिएको छ । महिलालाई नियमित स्वास्थ्य परीक्षणमा सहभागी हुन आग्रह समेत गरिएको छ ।