युनाइटेड अरब इमिरेट्स (यूएई)स्थित नेपाली दूतावासले त्यहाँ रहेका नेपालीलई अनावश्यक यात्रा नगर्न आग्रह गरेको छ । यूएईस्थित नेपाली दूतावासले शनिबार एक एड्भाइजरी जारी गर्दै त्यहाँ रहेका नेपालीलाई सावधानी अपनाउन भनेको छ ।

“मध्यपूर्वमा विकसित परिस्थितिका सन्दर्भमा संयुक्त अरब इमिरेट्समा रहनुभएका नेपाली नागरिकलाई अनावश्यक यात्रामा ननिस्कन, सावधान अपनाउन, यूएई सरकारले जारी गरेको सुरक्षा मार्गदर्शन एवं सूचनाहरूको पालना गर्न अनुरोध गरिन्छ,” दूतावासले भनेको छ ।

परराष्ट्र मन्त्रालयका वैदेशिक रोजगारीको सिलसिलामा सबैभन्दा ठूलो संख्यामा नेपाली यूएईमा रहेका छन् । यूएईमा हाल सात लाख नेपाली रहेका छन् ।
 
इरानले शनिबार यूएई, कुवेत, साउदी अरेबिया, बहरानइन, जोर्डन र कतारस्थित अमेरिकी सैन्य वेसमा मिसाइल आक्रमण गरेपछि यूएईस्थित नेपाली दूतावासले एड्भाइजरी जारी गर्दै त्यहाँ रहेका नेपालीलाई सावधानी अपनाउन भनेको हो ।

अमेरिका र इजरायलले शनिबार बिहान इरानमाथि अचानक आक्रमण गरेका थिए । त्यसलगत्तै इरानले इजरायल र अमेरिकी सैन्य वेशमाथि प्रत्याक्रमण गरेको हो ।
 
यूएईस्थित नेपाली दूतावासले त्यहाँ रहेका नेपालीलाई कुनै समस्या परे दूतावासको टेलिफोन नं. ९७१५०८१८०२८० मा सम्पर्क गर्न भनेको छ ।