सेवानिवृत्त मुख्य सचिव एकनारायण अर्यालले लगाएको चर्तुविद्याले गोकर्णमणी दुवाडीको मुख्यसचिव सपनामा ग्रहण लागेको छ ।

भ्रष्ट्रचार मुद्दामा डामिएका पूर्व मुख्यसचिव बैकुण्ठ अर्यालका प्यारा एकनारायण र गोकर्णको द्वन्द्व अलि पहिल्यैदेखिको हो । एमाले अध्यक्ष केपी ओलीले असाध्यै माया गर्ने एकनारायण र कांग्रेस सभापती शेरबहादुर देउवाको सालो भूषण राणाको एक नम्बरी कारिन्दा गोकर्णबीचको द्वन्द्व अठार महिना पुरानो हो।

गृहसचिव हुँदै मुख्यसचिव बनेका अर्याल र भूमि सचिव पछि गृहसचिव भएका गोकर्णबीच त्यहीँ समयदेखि हार्दिकता हराएको थियो।

बैकुण्ठ अर्याल मुख्यसचिव हुदाँ गोकर्ण उनको प्रदक्षिणा पदपदे गरेर खास्साका प्यारा बनेका थिए । बैकुण्ठसँगको प्यारले उनी भूषण राणाको कारिन्दा पनि बने । सचिव बढुवामा आधा दर्जन पटक पछारिएका गोकर्णलाई ठूलो रुखको ओत बिना जागिर चल्दैन भन्ने लागेकै थियो । त्यही भएर पनि उनले भूषणलाई दाहिना बनाएर अरुलाई देव्रेकिक हान्न रूची देखाए ।

एकनारायण मुख्यसचिव भएपछि रिक्त रहेको गृह सचिव पड्काएका गोकर्णले सबैलाई हेरेको हेरेकै बनाए । किनकी उनको गृहसम्म पुग्ने तागत सार्वजनिक रुपमा थिएन । तर, राणा फ्याक्टरले काम गरेपछि थप तागतै चाहिएन । उनी गृहसचिव बनेपछि अचम्म मान्ने कर्मचारीको संख्या अन्ठानब्बे प्रतिशत थियो ।

गृहसचिव भएपछि भूषण र उनका दिदी भिनाजु बाहेक गोकर्णले कसैलाई टेरेनन् । सिन्धुपाल्चोकमा सिडिओ हुँदा जानपहिचान भएकालाई गोकर्णले गोरखधन्धा चलाउने इजाजतै दिए । गृह प्रशासन इतिहासमै पहिलो पटक भुत्ते बनाए । जसको परिणाम जेनजी आन्दोलनको उग्रता हो।

सभापतिको सालाको मान्छे लाई गृहसचिव बनाएपछि ऊ बेलाका मन्त्री रमेश लेखक पनि निकम्मा भए । जसको चित्र सार्वजनिक रुपमै देखिएकै हो ।

ओलीको आर्शिवाद पाएका अर्यालले मुख्यसचिव भएपनि गृहै चलाए । गृहको मेसो नपाएका गोकर्ण केही समय अल्मलिए । जसै बुझे अर्यालका मान्छे धपाए । त्यसले अर्याल उग्र भए तर केही सक्ने अवस्था थिएन ।

गोकर्णलाई साईजमा ल्याएर छोडने अर्यालको योजना घर गएसँगै पूरा भएको छ । संयोगले दुई झगडिया एकैदिन घर गएका छन् । अर्याल उमेरहद र गोकर्ण सेवा अवधिको हदले घर गएका हुन् ।

अर्याल ५८ बर्षे उमेरहदले घर गएपनि गोकर्ण ५८ बर्ष पुग्न अझै धेरै बर्ष बाँकी छ । कथं उनी मुख्यसचिव भएका भए मुख्यसचिवको पूरै तीनबर्षे कार्यकाल चलाउन पाउँथे । तर, अर्यालले हानेको छिर्केको शिकार भएर स्वयम्भूको घरमै थन्किनु पर्ने अवस्था आएको हो।

मंसीर ८ गते बसेको क्याविनेटले १० गतेदेखि लागू हुने गरि रक्षा मन्त्रालयका सचिव सुमनराज अर्याललाई मुख्य सचिव नियुक्त गरिसकेको छ । उनले आजैदेखि असार २५ सम्म निजामतीको कमाण्ड सम्हालेका छन् ।

एकनारायण पछिको पहिलो नम्बरमा रहेका गोकर्णको हिसावकिताबै हराएको छ । आफू सँग सिँगौरी खेल्ने धादिङे दवाडीलाई स्याङ्जाली अर्यालले साईजमा ल्याएरै घर गएका छन् । 

आगामी असारमा सुमनलाई समय अगावै घर पठाएर कृष्णहरि पुष्करलाई मुख्यसचिव बनाउने एकनारायणको योजनाको पसाउँछ कि तुहिन्छ त्यो हेर्न चाँही बाँकी नै छ ।