व्यवसायी मीनबहादुर गुरुङले जेनजी आन्दोलनका क्रममा आफ्ना व्यापारिक प्रतिष्ठानमा आगजनी र लुटपाट हुँदा आफूले स्वीट पेन महसुस गरेको बताए ।

कर दिवरको अवसरमा उत्कृष्ट करदाता सम्मान ग्रहण गर्दै गुरुङले आफूमाथि पटकपटक आक्रमण गरिए पनि विचलित नभई उठ्ने प्रयास गरिरहेको बताए । बैंक र रोजगारी डुब्छन् भनेर अनेक आक्रमणपछि पनि आफू व्यवसायमा लगानी बढाउन बाध्य भएको उनको भनाई छ ।

‘देशको राजश्व खातामा कम पैसा जम्मा गरौँ भन्ने मलाई कहिल्यै लागेन । जति सक्छौँ तिरौँ भन्ने लाग्छ र हामीले तिरेको करबाटै देश बन्ने हो,’ उनले भने, ‘आखिर घुमेर त्यसको फाइदा हामीलाई नै हुने हो । म कोहीबाट लिन्नँ, दिन्छुमात्रै । भाटभटेनीले कमाउँदैन यसले दान गर्छ ।’

आर्थिक वर्ष २०८१/८२ मा वस्तु व्यापारको कारोबार गर्ने भाटभटेनी सुपर मार्केट तथा डिपार्टमेन्ट स्टोर प्रालि सबैभन्दा बढी कर तिर्ने व्यवसायिक फर्म बनेपछि सरकारले व्यवसायी गुरुङलाई उत्कृष्ट करदाताका रूपमा सम्मान गरेको छ ।