अख्तियार दुरुपयोग अनुसन्धान आयोगले डडेलधुराको आतिताल गाउँपालिका–३ स्थित कैलाश समैजेश्वर सामुदायिक वन उपभोक्ता समूहका अध्यक्ष सर्वजित मडैविरुद्ध भ्रष्टाचार मुद्दा दायर गरेको छ ।

मडैले सामुदायिक वनको कोषमा रहेको १८ लाख १५ हजार रुपैयाँ उपभोक्ता समितिको चेकमा किर्ते हस्ताक्षर गरी हिनामिना गरेको दाबी गर्दै बुधबार विशेष अदालत काठमाडौंमा मुद्दा दायर गरेको हो ।

सामुदायिक वन उपभोक्ता समूहका अध्यक्ष समेतको मिलेमतोमा किर्ते गरी सामुदायिक वनको कोषमा रहेको रकम हिनामिना गरेको उजुरी परेपछि अख्तियारले अनुसन्धान अघि बढाएको थियो ।

अनुसन्धान हुँदा कैलाश समैजेश्वर सामुदायिक वन उपभोक्ता समितिका अध्यक्ष मडैले कोषमा रहेको १८ लाख १५ हजार रुपैयाँ हिनामिना गरेको पाइएको अख्तियारद्वारा बुधबार जारी विज्ञप्तिमा उल्लेख छ ।

अख्तियारले दायर गरेको मुद्दामा मडैसँग १८ लाख १५ हजार रुपैयाँ बिगो मागदाबी गरिएको छ ।